Ma ki va, qa eve ho maré wa u bırayé
Pésey niyé, maqa é ki, qomé marayé
De ninu ho sas kerdo, béréç u bérayé
Her çiyé maré vané, yé sari ra cérayé
Ma baré vılé ma, çıqa ke zof gırano
Qa derdé ma ve destuné ma dermano
Heq maqa mordemi ré xırava ho ano
Kamo ke vazo, qom zonra morım bımano
Sar verde yé ho zono, yé ho vano
Xanedan zoné ho coru canéverdano
Dina sero qeçi tek téniya bımano
Ma jüyo ke caverdano, o ki xızano
Welaté ma ma ré, tım ca u waro
Şahidé ma, hundaé jiar u diyaro
Qa bézon nébeno, namé ho pıraro
Ca welato, qom ke zoné hora piyaro
Kam ke cıra bé xevero, nézoneno
Yé ho ke rast némıseno, néwaneno
Laz u çéna de, yé sari qesey keno
Keşi vıréniye néro, o lal maneno
Mevazé, serva çımuné der u doro
Zé her keşi, maré ki her çira coro
Derd ke ve desté mordemi vo, zoro
Ho dest ra ke kerd, dano saré horo
Kam ke ho ra remeno, tım posemano
Torné Thuji kılamu, zoné ho ra vano
Wazeno ke zoné ho dina sero bımano
Olli va xér bıdone, qa çiyé ke dano
*Ma sari ra névame marao, eve ho çinebiyao
*14 Çele 2009 Çarseme
