Aê ke şiyê / Saheyder Veroz

Vao de serdın vêreno mı ra
Zerrê mı cemed cêno
Kamo düra dür ma de nia dano
Kamo roca nianêne goça xo gureta
Kamo ma caverdano

Roji yenê roji qedinê
Adır lozınu ra sono
Taye roza xo de nia danê
Taye esq u çêfê xo derê
Kamo na derdu baru onceno

Payizo, zerko, dina cênce niya
Nêçe qul nêçe beg vêrdo ma ver ra
Tayine xêr kerdo tayine zulm
Peyniye de tiji herkesi rê ki şiya
Nıka nas nêbenê rêçi têser ra

Endi ne waxt waxto vırêno
Ne ki awa ke vêrde peyser vejina
Her çi nisto ostorê de qırri
Zovina jü dina serde şiyo
Mordemênia vırêne bexto vırên
Ae ra dıme endi keşi vir de niyo