Emser ki tı niyama bıra / Wusenê Gestemerde

Qey welat ra xo, kerd tobê?
Çımê ma rayan de şi, şew u roj
Aşmi vêrd ra, seri vêrd ra, demi vêrd ra
Emser ki tı niyama bıra

Çımê ma raya to ra peray
Hewn çımanê ma de heremiya
Tebat re ma êndi nêmendo
Payiz ame
Cuni dardiwe
Qırş u qal bi huşk
Pel u puşê daran rışiya, vay de şi
Tabiyati rengê xo vırna
Hardi rewa, awan cemed guret
Emser ki tı niyama bıra

Zımıstan amê
Vara vırêne varê ko u tuman ser de
Hesreta to mende emser rêna zerê ma de
Biya adır u kıle vêşena zerê ma de
Tı ke şiya, kes ma ser diyari nêbi
Kewara noni biye, kewara derd u kulan
Locına adıri nêant we
Niyame potenê non, saciya siyayê ser
Do meşke de, şıt adır ser ra qesiya
Sarê berz kê dayê, sarê berz kê
Rêyê ma ser diyari bê dayê, diyari bê
Mayê ewladê xo eşto
Kemer u dar amo rê zon ma ser de
Qedır u qıymet nêmendo, na dınya de
Biya wayire derd u kulan, na xeribiyê de
Biye adir u kılê, niştêro kezeba mı de
Gerê xo kam de keri, na dinya de?
Kam zere u weş ra, goş nano ra mı ser vacê?

Qey honde ma ra, kewta duri?
De bê êndi, ma hesretan de meverde
De bê êndi, ma qısawetan de meverde
Kam ame, tı niyama bıra

Berlin, 06.12.03