Onca ki cenet bi hardê ma / Poyraz

Zımıstu çetın vêrdêne ra
Onca ki cenet bi hardê ma
Vore guretêne dormê ma
Onca ki cenet bi hardê ma

Rau ra lıngu de lekanê ma
Destu de lapıkê rêsınê ma
Serê bonu de çêsanê ma
Onca ki cenet bi hardê ma

Vore rêştêne qorunê ma
Bereqiyêne koyê ma
Çığ gınêne derunê ma
Onca ki cenet bi hardê ma

Asma Xızıri de bi cemê ma
Xızır rêştêne tengiya ma
Zımıstu amêne pirê ma
Onca ki cenet bi hardê ma

Zerrê darên de bi mirê ma
Saji de pêsêne nunê ma
Rau ra perrêne çımê ma
Onca ki cenet bi hardê ma

Ciran biyêne meymanê ma
Serê honike de şirê ma
Thırs têji lewe de doê ma
Onca ki cênet bi hardê ma

Lozıne de bi adırê ma
Zerrê çêyi de biye çıla ma
Hard ser biyêne ra çilê ma
Onca ki cenet bi hardê ma

Serd u puk bi zımıstanê ma
Çê u axure de karê ma
Phoşta ma de gran barê ma
Onca ki cenet bi hardê ma