Zazayandê ma ra tayn bi,
Mılla, xoca, heci u weli,
tayn bi mırid u sofi,
tayn bi Tırk u Kürdi,
labırê kes Zaza nêbi
u Zazay niyardi xoviri
Semedê nahf u menfeeti,
berdi Zazay têtewr roti
Heci va; Wıllı hecdê mı ser,
xocay va; Billi dindê mı ser,
weli va; Kerameta mı ser
u dest verday pıstanan jewber,
miyan ra veti zuri jewser
Bı wıniya inkarina xo dê teber
Ne din verda, ne hec kerd ber
Kerd seqet u eşt mılletı ver
Taynan va; Ma yê, ma Alımi
Taynan va; ma yê Pırofesori,
bı una Zazay kok ra inkar kerdi
u cıser nuşnay nuşteyê zuri
Nê ne alımê, ne pırofesorê,
nê ixanetkarê bilımiyê
Alım u pırofesorê inkarkerdoxi,
wıllı nêşenê bıbê Zanayoxi
Fıkrê unay nêbenê fıkri,
fıkrê inan benê fıkrê cılqi
Vinayena una qe seni bena,
demo kı duri bo raştey ra?
Tayn vanê ma bırayê pêyê,
peydı şınê ê bıray kışenê
Na seni, seni bırayina,
bırayinı wına nêbena
Bıbo, bıbo, na şena bıbo,
xayıney u xapeynayenı
Na zura, zur u bêbextina,
hertım ma serro varena
kışta neyarandê ma ra
Herwext demokrasi vanê
Labırê heq nêsınasnenê
U heqê kesi hertım wenê
Demokrasi xorê perde kenê
Unaya pa şaran xapeynenê
Zurê inan qe, qe nêqedênê
Nêdo bı çıhesaba insanbê
Nê insan niyê nê barbarê
Hertım şaranê binan kışenê
Tım vanê ma demokratê
Zıwan u kültüri men kenê
Heqê kesi nêdanê, bırnenê
Tertele terteli serro vıracenê
Ma insanê vanê u nutıqi erzenê
Demo kı yenê u ma kışenê
Zirtıki danê xo u çepıki cınenê
Bısınasnê, işte nê wınayê
Nê leyrê Heş u Verganê
Tayn bi cambaz u canan
Bazar kerd şarê Zazayan
Semedê qoltıx u mewkiyan
Hiç hesıbna şarê pancmilyonan
Berd kerd şarê jewna şaran
Ninan dı çıniyo dürıvê insanan
İnan fınê xo roto neyaran
U ê biyê koley koleyan
Tızbey cı destı vanê HOMA
Bınra adır verdanê gandê ma
Tızbey anti HOMA HOMA va
Şi tene, dız u gıdişê ma nay pa
Yalla yalla, hadrê yalla va
Berd dew u banê ma nay pa
Dar u berê ma têtewr veşna
Qerşun, adır u barut varna
Cayê nêverda heme na pa
Tayn bi rayber, tayn bi şopci
Tayn bi dewrımci tayn xırxızi
Tayn bi mafiya tayn qabadayi
Tayn zi bi şêx, axa, beg u miri
Xo çıman verro kesi Zazay nêdi
Kesê kı dı eslê xo dı Zazay bi
İnan xo Zazayan ra vıst duri
Da pıro u şi bi Tırki, bi Kürdi
Semedê menfeeti Zazay kerdi vıni
Bı zurana va; Ma jew mılleta
Niyame hesabdê cı, va şo ata
Herwext destê xo eşt çekan
U şi resay şarandê binan
Jahr, top u qerşuni varnay
Têtewr kışti bêsuc u bêgünay
Bêbext, zurker u rezilê unay
Jewna cadı dınya niyamey
Dur, zahf durira nê amey
U seredê ma serro bi bellay
Zalımê unay marda xo ra zay
Berd xo vıst qılıxdê insaney
Bêaras zor u zılım da jewnay
Va noyo demokrasi u heqey
İşte mayê danê heqê bırayey
Şıma zi xo rê bıwazê helaley…
2006-04-01.
Koyo Berz
