Welat persena, welat ma ra dürio
Zereqê tiji sokmıs kerdo, sodıro
Welat zaf kuto ra ma viri
Wusar ma werdêne kenger u şiri
Hêlıge kerdêne arê, sıng u rıveşi
Savıla khırr-khewiye, thırsıkê thırşi
Çêu barkerdêne, şiyêne waru
Dewe de kokımi bervêne, eve şüaru
Vas çinıtêne, fike u mırzor
Waru de ki şamboe ve kınkor
Cêwn çarnêne, genım estêne ra vay ver
Kerdêne arê nun, ğıze de estêne pêser.
Biyêne payiz, waru ra barkerdêne amêne
Koyê çêvêsayi devana ho ve ho nalêne
Devana peyniya dina ama, her çi biyo melul
Dina de kes çino, coka nêwaneno bılbıl
Şiliya payiji hurdi hurdi varêne
Qırawu eştêne, husku gırêdêne
Rozê ustêne ra ke, vore noro cı vora
Qamısarat cêvışiyo, rae pê huyu keme ra
Koliu kena soba, hêzu erzena ver
Soba gımena, coru nêbena serd
Şiro qult pocenê, nisenê ser
Sanıku qesey kenê, sewunê dergu de ciranu anê pêser.
Marte ke amê bena yorxêçıke, sepeta ho cême
Vore dame ra, herre ra hêgu pux keme
Belek kuno verê vore
Roji benê derg, tiji herey sona ko ro
Derdê çêvêsayi oncia benê têra
Xeyri oncia şüaru vano ho vero.