Ondere omnoniyo
Asmu ra asma wertiye,
Roza hotine
Yeneo peroz ra tepiya
Roz ceriya mı sero
Werte roji de
Dae zerrê mı perseno
Girino gıneno ve qırtıka mı veri
Je roza ewroyene yena ra mı viri
Gula mına verê vore
Çemo, çemo Munzıri!!!..
Vılê xo torê nan ro muye ra bari
Darê Haqiyo to ver de
Pêskarê roala mı meve!!..
Hona newe kota des u phonc serri
Qeke nê ju roze dên bıde
Serva meste!..
Xeylê hewnê Ebruya mı estê
Vınde!..Mırd vırare pırafiyo
Rengê pembey u sekerune suru sero
Gula mına verê vore.
Her roza hotine
Tora heredanune Çemê Munzıri
Sıma ra ki
Hardo dewres u asmeno khewe
Se veno reê mı ra vazê
Guna u movalê Ebruya mı çık vi?.
Mı deṣti kerd ra hetê to ser
Ajiya cigera xo ver
Jivon, zırçon to ra!!!..
Heṣtirê mı rıṣayi bi laṣeri
Almanya guretê xo ver hata ve Dersımi
Nêmey gınayi phelunê to ro
Nêmey ki ṣi zerrê mı ro bi huski
To re ki nêmano Çemê Munzıri!...