ileyna: tarixê jü eşqê de kılmi / ali himmet dağ

1-
ae ra mı rê jü resmê de khan mend
satê de germıne kağıte ser
jü hüyaişê de sia o sıpê
hêdi hêdi beno çeqer

hona ke İleyna êna mı viri
jü dılopa aşme
gınena qenefçê şewe ra
hem şewe vêşena, hem ki ez

ae ra mı rê jü çhik mend
wertê adırê cenemi ra
kristalê şewo cemediyae
ebe tania çhiki heliya
letıkê qesê eşqi
kristalê şewe ra gınay wara
astıkê mı bêgoşt mendi

2-
İleyna jü theyre biye
jü theyra kaleka dengızi
perrê dae kefê awe biy
eke ae hes bıkerdêne
bê sindor hes kerdêne
bê lome hes kerdêne

çı waxt ke dengızê ruti
hewrê xo çımanê ma vera dardêne we
imga[1] canê daya sıvıke
zerê ma ra dariyêne we, şiyêne

3-
ma o amnan pia viarna ra
thamaranê mermerê awe ra
dı qelbê dırbetıni kınıti
ebe zengenê de jengıni
araqê ma beqanê çarfeke rê bi şiraniye
bêçıkê manê ke porê jümini de qefeliya bi
biy masi, reşti dengızi

ma seba hêkata ma rê
heserê newi day ardene
seba adırê dewrêşi
darê mazênê huşki

wayirê kerametanê khana, Pandora
wele ra kupê şerabi potêne seba ma ra
ma hetê ra şerab şımıtêne
hetê ra cüaniyê[2] xuyê qemeri[3] ramıtêne
deşta gunana derge de verba herami

ma be her guna taêna biyêne isan


4-
jü destê şodıri çıla şiye xo ra
a roja siae
dengızi İleyna xeneqnê
(taê ji vanê: ez biyo sebebê qetlê dae)
pey de jü kılama nême mende
a şiye, ez biyo kemi

a aşıqa dengızia rındeke ra
mı rê jü resmê ğeyala mend
kıle ke lojıne ca verdana
atmosferi de bena lete lete
hardlerzê eşqi peyda beno
serê mermerê khewi de
na çend serri ra tepia hona
çıla çımanê İleyna şona xo ra


çıla rüyê dae
teyna zerê mı de vêşena

Ali Himmet Dağ
06-12-1998

[1] imga=Trk. imge, hayal
[2] cüani: thay, kurık
[3] açık kahverengi