Bê to, hîşê mi şîwû, ez xo de nîyû
Destê to ra nêbû, şerab şîrin nîyû
Cuyayîşê na dinya, bê to caîz nîyû
La, vengê bilbil zî bê gul weş nîyû
***
Rizqê mi, ena dinya de bermayîşû
Mîyanê çerxê felek de elewyayişû
Her kuçe de erd ro feknur kewtişû
Ehwalê mi, binê dêsan de nalayîşû
***
Pirnikê ma erd ra şî, çewî paxa ma nêkerd
Wendiş û xebatê ma cayîk de pere nêkerd
Şarî ewnîya ma ra, pê ma huyayî yarî kerd
Ma, xo na ehmeqan sero ma xo heba kerd
***
Pirnikê ma erd ra şî qey ma zur nêkerd
Tim û tim ma feqîrî qey ma dizdî nêkerd
Şari, ma de xayînû qey ma yaranî nêkerd
Ma binî lingan ra şî qey ma asparî nêkerd
***
Biza erîşin nezanan rê bîya rayber
Înan va;¨ena şêxa zanyara hember¨
Xo purt kerd ci rê viraşti keye û keyber
Ya vaşê xo werd, pişkilî kerdi înan ver
***
Ey ayo ke şerabî mi rê xirab vanû
Xirab ayû ke ayetan ser o zure vanû
Zekat xo rê gênû feqîran rê sebir vanû
Şerab mi rê weş helalû kîtab ana vanû
***
Vengê teyaran û firfirakanê dişmenî asmîn girewtû
Bombeyan varnenî dewan veşnenî zerr adir girewtû
Pê êynîn fehşîye kenî, vanî qey welatê ma girewtû
Cîwanî neweyî vecîyayî, pêrin keleş û rext girewtû