jü khalê axır zemani / ali himmet dağ

1.
ma waşt ke tepia bıcêrime ra qelbê zemani
xo nas bıkerime. qomê xo nasbıkerime, qomê cirani...
mevısiyayme qomê khani ra, koka xo ra.
bızanime kamci aciye ma ardime meydan
kamci wele de poiyo, postıkê nakê ma

kamci awanê dewrêşa ma şütime, robarê xo de
hetanê çı waxt vêşenê hona, çılê serê ziyaran u diyara
kamê çewres asparê aşm u roci
kotio uli diwan

ma waşt ke tepia bıcêrime ra qelbê zemani
kamci koan o deşta ser bıcêrime ya, ma
kamci kemeran o hewşo ser bıcêrime ya
eke waxtê peyser cêraişi ame!

ma waşt ke tepia bıcêrime ra qelbê zemani
koti ronime distaria germi, loğe, ğıza arda
quşxanê paxıri, badiya doê tırşi, tencıkê awa serdıne
kamci axpini de, kamci merge de, kamci hêgay de
hard ra bıküme, silkê astoranê xo

2.
serê şani jü asparo na sate
suretê teynatine de
destê xo rüyê xo ra gırs
siya xo xo ra derg

serê şani vaê ğeybio, na satê
jü khalê axır zemani
jü asparê waxtê veri
Uskura ra

3.
waxto ke moğırbê zerri bi qalınd
roc dem diya peyê koanê vırana de
jü şewê de Xormeçıke xo kerd vıla
taqan o pelanê daranê Xormekiye ra

waxto ke jü hêketê de derge
xo da nıvısnaine
ebe kelımanê dırbetına
ortê nê tarixê virakerdi de

jü khalê axır zemani
jü asparê waxtê veri
veciya, ame
qılaşê düwarê Khela Qasıma ra

4.
waxto ke cıla xo de çerexiya, çhem
ame morkerdene, hardo dewrêş
kerdi kilıt, koê çêverê xo
surre vınete, şıliye vınete, adır vınet
kewte çımanê tırami, xavıka hewni

jü khalê axır zemani
jü asparê waxtê veri
xelesiya ra, ame
zindananê bınê hardi ra

waxto ke perrê qılancıke bi vindi
zerrê tariye hêketanê khana de
waxto ke dıriya, pırenê mari
waxto ke teqa, postıkê zemani

jü khalê axır zemani
jü asparê waxtê veri Uskura ra
ame war, Khela Qasıma ra
şi çêverê ciranê serra kuya

5.
o khalo herdişesıpê
o khalo destadır
o khalo zerremar
hama hama ke şoro xo ra, lemboa weşiye
amê, tarixê ma de bi meyman

belkia khalıkê domananê Qasımano
o asparê waxtê veri
o khalê axır zemani
belkia qe çino zuretê xo
acê xo nêmendo pey de nê caa

6.
ma adırê destanê xo kenime weiye
ebe kıla serro
derheqê merden o weşiye qesê kenime
derheqê aciya ke ê mawa

7.
tı vana, berbişê bulure oncino, êno
xoriyê hardi ra, xoriyê sênê hardi ra
bena qêraiş aşme -vengê theyra de-
waxto ke şewe şenık şenık vare peyê koa de

dırbetiê ma koa ra daha biy gırsi waxto ke
jü vaê de Xormeçık gımeno derê Qasıma de
jü vaê de Xormeçık heni gıran heni vêşae
jü aşmê de pırre can dana, zerrê heqbê mı de
goni de manenê, qorê astore
goni de maneno, o asparo khal
o khal, o asparê waxtê veri
o khal, xortê axır zemani